कोल्हापूर : येथील विवेकानंद कॉलेजमध्ये ‘बी. व्होक., ग्राफिक्स डिझाइन विभाग’ आणि पुणे येथील ‘आर्ट अँड क्राफ्ट गॅलरी’च्या वतीने कलाकारांसाठी ‘क्रिएटिव्ह कॉन्फरन्स’ या विषयावर शनिवारी, १५ जुलै रोजी सशुल्क एकदिवसीय कार्यशाळेचे आयोजन करण्यात आले आहे. शिक्षणमहर्षी डॉ. बापूजी साळुंखे स्मृतिभवनमध्ये सकाळी ११ ते दुपारी दोन या वेळेत ही कार्यशाळा होईल. प्रथमच अशी कॉन्फरन्स विवेकानंद कॉलेजमध्ये होत आहे. हस्तशिल्प कलाकारांच्या कलेला व्यावसायिक स्तरावर नेण्यासाठी ही कार्यशाळा उपयुक्त ठरणार आहे. येथे कलाकारांना व्यवसायविषयक शिक्षण दिले जाईल. अशा प्रकारची देशातील ही एकमेव कार्यशाळा आहे.
यामध्ये कलाकारांना कलाकृती कॉपीराइट आणि बौद्धिक संपदा हक्कांबाबत अॅड. गौरी भावे मार्गदर्शन करणार आहेत. ‘आर्ट अँड क्राफ्ट’ या सामाजिक संस्थेच्या संस्थापिका अक्षया बोरकर या ऑनलाइन व्यवसायात येणाऱ्या अडीअडचणी आणि फायदे-तोटे कसे हाताळावेत याबाबत मार्गदर्शन करतील.
‘आर्ट अँड क्राफ्ट’ ही संस्था एक बहुराष्ट्रीय पुरस्कारप्राप्त टेक्नॉलॉजी स्टार्ट-अप कंपनी असून, गेली तीन वर्षे ती ललित आणि हस्तकला कारागिरांना दर्जेदार मार्केटिंग, सोशल मीडिया, वेब विकास सुविधा पुरवत आहे.
या कार्यशाळेमध्ये कोल्हापूर, सांगली, कराड, सातारा, पुणे, सोलापूर आणि मुंबई येथील कलाकार, चित्रकार, जाहिरातदार, हस्तशिल्पकार सहभागी होणार आहेत. कलारसिकांनी याचा लाभ घ्यावा, असे आवाहन विवेकानंद कॉलेजचे प्राचार्य डॉ. एस. वाय. होनगेकर आणि बी. व्होक. विभागाचे समन्वयक प्रा. सतीश गायकवाड यांनी केले आहे.
